കൊയിലാണ്ടി: എസ് കെ എസ് എസ് എഫ് സംസ്ഥാന കമ്മിറ്റിയുടെ ആഭിമുഖ്യത്തിൽ നാളെ (ശനി) കൊയിലാണ്ടി സ്പോർട്ട്സ് കൗൺസിൽ സ്റ്റേഡിയത്തിൽ നടക്കുന്ന ട്രൈസനേറിയം സമ്മിറ്റിന് ഒരുക്കങ്ങൾ പൂർത്തിയായി. സംഘടനയുടെ മുപ്പതാം വാർഷികാഘോഷങ്ങളുടെ സമാപനമായാണ് പരിപാടി സംഘടിപ്പിക്കുന്നത്. രാവിലെ 9.30ന് ആരംഭിക്കുന്ന പരിപാടി വൈകിട്ട് 5 മണിക്ക് സമാപിക്കും. പരിപാടിക്ക് മുവ്വായിരം പ്രതിനിധികൾക്ക് ഇരിക്കാവുന്ന വിശാലമായ പന്തൽ നിർമ്മാണം പൂർത്തിയായി. ശനിയാഴ്ച രാവിലെ സയ്യിദ് അബ്ബാസലി ശിഹാബ് തങ്ങളുടെ അധ്യക്ഷതയിൽ പരിപാടി സമസ്ത പ്രസിഡന്റ് സയ്യിദ് മുഹമ്മദ് ജിഫ്രി മുത്തുക്കോയ തങ്ങൾ ഉദ്ഘാടനം ചെയ്യും. ജനറൽ സെക്രട്ടറി പ്രൊഫ. കെ ആലികുട്ടി മുസ് ലിയാർ അനുഗ്രഹ ഭാഷണം നിർവ്വഹിക്കും. കെ മുരളീധരൻ എം.പി മുഖ്യാതിഥിയായിരിക്കും. എ വി അബ്ദു റഹ്മാൻ മുസ്ലിലിയാർ, കെ ഉമർ ഫൈസി മുക്കം, കെ ദാസൻ എം എൽ എ, സയ്യിദ് ഹുസൈൻ ബാഫഖി തങ്ങൾ സംബന്ധിക്കും.
തുടർന്ന് അബ്ദുസ്സലാം ഫൈസി ഒളവട്ടൂർ തർബിയ സെഷന് നേതൃത്വം നൽകും. ‘നാം നമ്മുടെ പ്രസ്ഥാനം’ എന്ന വിഷയത്തിൽ ഓപ്പൺ ഫോറം നടക്കും. അബ്ദുൽ ഹമീദ് ഫൈസി അമ്പലക്കടവ്, മുസ്തഫ മുണ്ടുപാറ, ഷാഹുൽ ഹമീദ് മേൽമുറി,നാസർ ഫൈസി കൂടത്തായ്,ഓണംപിള്ളി മുഹമ്മദ് ഫൈസി എന്നിവർ നേതൃത്വം നൽകും. എസ് വി മുഹമ്മദലി മോഡറേറ്ററാവും.
ഉച്ചക്ക് ശേഷം ആരംഭിക്കുന്ന ‘നമ്മുടെ കർമ മേഖല’ എന്ന സെഷൻ സയ്യിദ് ഹമീദലി ശിഹാബ് തങ്ങളുടെ അധ്യക്ഷതയിൽ എം.ടി അബ്ദുല്ല മുസ് ലിയാർ ഉദ്ഘാടനം ചെയ്യും. ഡോ.കെ.ടി.എം ബഷീർ പനങ്ങാങ്ങര ചർച്ചക്ക് നേതൃത്വം നൽകും.
തുടർന്ന് ‘മതം മതേതര ഇന്ത്യക്ക്’ എന്ന വിഷയത്തിൽ സൗഹൃദ സംവാദം നടക്കും. സയ്യിദ് സാദിഖലി ശിഹാബ് തങ്ങൾ, ഡോ. ശ്രീ ശ്രീ ആര്യ മഹർഷി, ഫാദർ ഡോ. ജെറോം ചിങ്ങന്തറ എന്നിവർ സന്ദേശങ്ങൾ കൈമാറും.
വൈകിട്ട് ഏഴ് മണിക്ക് സംഘടനയുടെ 2020-22 ലേക്കുള്ള സംസ്ഥാന കൗൺസിൽ ചേർന്ന് പുതിയ സംസ്ഥാന ഭാരവാഹികളെ തെരഞ്ഞെടുക്കും. തെരഞ്ഞെടുപ്പ് സമിതി കൺവീനർ കെ.മോയിൻ കുട്ടി മാസ്റ്റർ നേതൃത്വം നൽകും.
നിലവിലുള്ള സംസ്ഥാന കൗൺസിലിന്റെ സമാപനയോഗം ഇന്ന് (വെള്ളി) വൈകിട്ട് 4.30 കോഴിക്കോട് സുപ്രഭാതം ഓഡിറ്റോറിയത്തിൽ സംസ്ഥാന പ്രസിഡന്റ് സയ്യിദ് ഹമീദലി ശിഹാബ് തങ്ങളുടെ അധ്യക്ഷതയിൽ സുന്നി യുവജന സംഘം ജനറൽ സെക്രട്ടറി സയ്യിദ് മുഹമ്മദ് കോയ തങ്ങൾ ജമലുല്ലൈലി ഉദ്ഘാടനം ചെയ്യും.
