കോഴിക്കോട്: മുഹമ്മദ് നബി (സ) അനുപമ വ്യക്തിത്വം എന്ന സന്ദേശ പ്രചാരണത്തിന്റെ ഭാഗമായി എസ് കെ എസ് എസ് എഫ് സംസ്ഥാന കമ്മിറ്റി ഡിസംബര്‍ രണ്ടിന് കൊളപ്പുറം ഇരുമ്പു ചോലയില്‍ മദീനാപാഷന്‍ സംഘടിപ്പിക്കും. ഉച്ചക്ക് ശേഷം മുന്ന് മണി മുതല്‍ രാത്രി 10 വരെ നടക്കുന്ന പരിപാടിയില്‍ പ്രമുഖ പണ്ഡിതരുടെ മദ്ഹുറസൂല്‍ സന്ദേശങ്ങള്‍, ബുര്‍ദ, ഖവാലി ,സുപ്രസിദ്ധ ഗായകരുടെ മദ്ഹ് ഗാനാലാപനങ്ങള്‍ തുടങ്ങി വൈവിധ്യമാര്‍ന്ന പ്രവാചക പ്രകീര്‍ത്ത പരിപാടികള്‍ നടക്കും. സംസ്ഥാനത്തിന്റെ വിവിധ ഭാഗങ്ങളില്‍ നിന്നെത്തുന്ന പ്രവാചക സ്‌നേഹികള്‍ക്ക് മദീനയെ ഒര്‍മിപ്പിക്കുന്ന വ്യത്യസ്ഥമായ സദസ്സാണ് ഇതിന് വേണ്ടി പ്രത്യേകമായി സംവിധാനിക്കുന്നത്. പരിപാടിയുടെ മുന്നോടിയായി ജില്ലാ തലങ്ങളില്‍ മദ്ഹുറസൂല്‍ കോണ്‍ഫറന്‍സുകള്‍, സര്‍ഗലയ ജില്ലാ സമിതികളുടെ നേതൃത്വത്തില്‍ കവിതാലാപന മത്സരം, റൈറ്റേഴ്‌സ് ഫോറം സംസ്ഥാന സമിതിയുടെ നേതൃത്വത്തില്‍ പ്രബന്ധരചന മത്സരങ്ങള്‍ എന്നിവ നടക്കും. ത്വലബാ വിംഗ് മേഖലാ സമിതികളുടെ ആഭിമുഖ്യത്തില്‍ നബി ജീവിതത്തെ ആസ്പദിച്ച് സെമിനാറുകള്‍, ക്ലസ്റ്റര്‍, ശാഖാ തലങ്ങളില്‍ മൗലിദ് സദസ്സുകള്‍, ആസ്വാദന സദസ്സുകള്‍, പ്രഭാഷണം തുടങ്ങിയ പരിപാടികള്‍ നടക്കും. സൈബര്‍ വിംഗ് സംസ്ഥാന സമിതിയുടെ നേതൃത്വത്തില്‍ പ്രവാചകനെ കുറിച്ചുള്ള പ്രമുഖരുടെ വീഡിയോ സന്ദേശങ്ങള്‍ സാമൂഹ്യ മാധ്യമങ്ങളിലൂടെ പ്രചരിപ്പിക്കും.
